Messelgryfjan

Messelgryfjan er einstæður vitnisburður um ákveðið tímaskeið í jarðsögunni og þær loftslagsbreytingar sem orðið hafa. Í henni hafa fundist steingerðar leifar um 40 000 jurta og dýra og hún er því einn gjöfulasti fundarstaður sinnar tegundar í heiminum. Hér má sjá undur þróunarinnar og lífsins fyrir 47 milljónum ára opinberast í 109 jurtategundum, 8 fisktegundum, 31 skriðdýrstegund, 5 tegundum láðs- og lagardýra, rúmlega 50 fuglategundum, að viðbættum 30 tegundum lindýra (einkum skordýr).

Fólk á öllum aldri og af ólíkum uppruna hrífst af sérstöku andrúmslofti þessa staðar. Með því að njóta leiðsagnar lærðra vísindamanna eiga gestir þess kost að kynnast horfnum heimi, þar sem ríkti formfegurð og litadýrð. Heimur regnskógarins, sem umlykur gamlan eldgíg, fylltan af vatni, verður ljóslifandi fyrir augum gestsins. Vegna þeirra stórkostlegu steingerðu  leifa sem hér hafa fundist, og óvenjulega mikilla gæða steingervinganna, hefur tekist að draga upp nákvæma mynd af líffærafræði og lifnaðarháttum hinna horfnu lífvera. Sérstaka athygli vekja í þessu sambandi steingervingar spendýra, steingerðar leifar af frumstæðum hestum. Alls hefur tekist að finna heillegar beinagrindur af rúmlega 30 slíkum fornaldarhestum. Greiningar á innihaldi meltingarfæra hafa gefið vísbendingar um næringu og lifnaðarhætti lífveranna. Messelgryfjan er talin einstakur og tegundaríkur gluggi að lífinu á tertíer-tímanum. Steingervingarnir veita innsýn í heim lífsins, u.þ.b. 13 milljón árum eftir að risaeðlurnar dóu út. Forverar þeirra dýra og jurta sem við þekkjum í dag, hrífa alla sem halda til fundar við fortíðina og fjölda lífvera, sem eru ekki lengur til.