Limes - "varnarveggurinn" - landamæri rómverska ríkisins

Hin fornu rómversku landamæri, "Limes" (upprunalega lat: "landamæravegur"/"landamæri", sbr. en: limits) eru u.þ.b. 550 km. löng. Með virkjum, varðturnum, múrum og rimlagirðingum varði forna rómverska heimsveldið ríki sitt fyrir hinni frjálsu Germaníu fyrir 2000 árum. Þessi landamæri eru með áhrifamestu og lengstu rústum af jarðmannvirkjum sem fundist hafa í Evrópu.  Hér mætast háþróuð menning hins forna Rómarveldis og menningarlegt "þróunarríki" hinna frumstæðu Germana.
Landamærin ("Der Limes") liggja frá Bad Hönningen / Reinbrohl við Rín til bæjarins Regensburg við Dóná. Auk fornminja sem varðveist hafa frá Rómartímanum getur hér einnig að líta endurbyggingar, uppgröft og eftirlíkingar. Að hluta eru hin fornu landamæri sjálf  mjög greinileg, þar sem þau liggja á löngum köflum í þráðbeinni línu í gegnum skóga og yfir akra. Sérlega áhugaverðir staðir á þessari leið eru: Saalburg í Bad Homburg, virki sem var endurbyggt í upprunalegri mynd, Rómverjasafnið í Osterburken, landamærasafnið í Aalen með fornleifagarðinum, virki, rómversk böð og Rómarsafn með upplýsingamiðstöð um hin fornu landamæri í Weissenburg.